ILOILO – Nagtukod na sang task force ang Iloilo Provincial Government agud nga magpatigayon sang monitoring tuhoy sa African Swine Fever sa pungsod.
Sa interview sang Bombo Radyo kay Iloilo Governor Arthur Defensor Jr., iya ginpahayag nga nagsapol na ang mga veterinarian sang Department of Agriculture agud istoryahan ang mga pamaagi agud nga indi makalab-ot sa probinsya sang Iloilo ang African Swine Fever.
Suno kay Defensor, indi dapat magsalig ang Department of Agriculture nga sa Luzon lamang ang nasambit nga balati-an bangud nga mahimo man ini nga maglaton sa mga baboy sa Western Visayas.
Ginpahayag ni Defensor nga katungdanan sang task force nga magpatigayon sang monitoring agud mahibalu-an kun may yara sang sintomas sang African Swine Fever sa mga live hog ukon ginasagod nga baboy sa probinsya sang Iloilo.
Kun tani suno sa gobernador, may yara man sang maid-id nga monitoring sa karne ukon meat products nga gina-supply sa rehiyon.
Wala pa sang may na record nga kaso ang African Swine Fever sa probinsya sang Iloilo.
Sa interview sang Bombo Radyo kay Dr. Silvino Teodosio Jr. sang Provincial Veterinary Office, iya ginpahayag nga sa subong, hilway sa African Swine Fever ang mga live hog ukon baboy.
Suno kay Teodosio, madasig ang paglapta sang virus nga magaresulta sa outbreak rason na kinahanglan ini nga matapna gilayon.
Ginpahayag ni Teodosio nga indi makalalaton sa tawo ang nasambit nga balati-an apang mahimo ini nga makaapekto sa ginasagod nga baboy.
Ang mga matapikan sang nasambit nga balati-an suno kay Teodosio ang kinahanglan na nga i-dispose sang maayo bangud nga indi na mahimo nga kaunon ang karne sang sapat.
Mas makapaayo suno sa natungdan nga nagapanghanda ang probinsya sang Iloilo agud nga makalikaw sa African Swine Fever oubteak.
Sa subong, aprobado na ni Iloilo Governor Arthur Defensor Jr. ang pagtukod sang Task Force on African Swine Fever nga ginabug-usan sang lima ka team.
Ang tagsa ka team suno kay Teodosio ang may yara sang nanari-sari nga katungdanan agud nga matapna ang posibilidad nga makalab-ot sa probinsya sang Iloilo ang nasambit nga balatian.
