ILOILO – Magapadulong si Presidente Rodrigo Duterte sa Camp Peralta sa Jamindan, Capiz sa Setyembre 19 agud pangunahan ang pormal nga demilitarization sang 310 ka mga anay katapo sang RevolutionaryPproletarian Army-Alex Boncatao Brigade ukon RPA-ABB sa headquarter sang 3rd Infantry Division sang Philippine Army.
Sa interview sang Bombo Radyo kay Capt. Cenon Pancito III, Public Affairs Office chief sang 3ID, iya ginpahayag nga ila ginalauman ang pagpadulong sang presidente sa ila talatapan sa diin ipidalom sa decommisioning process ang mga anay katapo sang RPA-ABB sa sulod sang duha ka bulan.
Suno kay Pancito, kabahin man sang proseso amo ang paghanas kaangay sang military kag hatagan man sila sang gobyerno sang armas agud mangin special civilian active auxiliary.
Dugang pa niya, ang mga anay katapo sang RPA-ABB ang naghalin sa Maasin, Iloilo; Ibajay, Aklan; Tanjay City, Negros Oriental kag mga syudad sang Bago, Cadiz, Kabankalan, kag sa banwa sang Cauyan sa Negros Occidental.
