ILOILO – Yara na sa kustodiya sang Bureau of Jail Management and Penology ang 14 ka mga preso nga nahatagan sang Good Conduct Time Allowance nga nagsungka sa probinsya sang Iloilo.
Sa interview sang Bombo Radyo kay Jail Superintendent Gilbert Peremne, Deputy Regional Director for Administration sang Bureau of Jail Management and Penology 6, iya ginpahayag nga ang 14 ka Good Conduct Time Allowance grantees ang yara na sa mess hall sang Iloilo District Jail sa Brgy. Nanga, Pototan, Iloilo.
Suno kay Peremne, indi makabig inmate ang mga anay preso apang yara lamang sila sa sulod sang nasambit nga jail facility kag natalana nga iga turn-over sa Bureau of Corrections.
Ginpahayag ni Peremne nga bag-o gindala sa Iloilo District Jail ang mga anay preso, sila ang ginpahangop kag ginpapirma sang waiver.
Ang Bureau of Jail Management and Penology naman suno sa natungdn ang magagasto sa transportation sang mga anay preso sa tion nga dal-on na sa Bureau of Corrections.
Sa bahin naman sang Antique nga may yara sang anay preso nga ginapaidalom sa dialysis sa tagsa ka semana, ginpahayag ni Peremne nga ginkuhaan lang sang data ang nasambit nga preso.
Ang data nga nakuha ang ginpasa na sa Headquarter sang Bureau of Jail Management and Penology.
Samtang, facilitator lamang ang katungdanan sang Bureau of Jail Management and Penology sa pagkustodiya sang mga anay preso nga nahatagan sang Good Conduct Time Allowance.
Sa interview sang Bombo Radyo kay Atty. Jairus Anthony Dogelio, legal counsel sang Bureau of Jail Management and Penology 6, iya ginpahayag nga ginasunod lamang sang ahensya ang mandu ni Presidente Rodrigo Duterte nga dapat ikustodiya ang mga nagsungka nga preso nga nahatagan sang kontrobersyal nga Good Conduct Time Allowance bag-o iga turn-over sa Bureau of Corrections.
Suno kay Atty. Dogelio, indi siya makabuya sang pahayag kun bala makabig nga paglapas sa tawhanon nga kinamatarong sang mga anay preso ang liwat nga pagkustodiya sa ila.
Ginpahayag ni Atty. Dogelio nga ang Bureau of Jail Management and Penology ang nagabulig lamang sa mga law enforcement agency kasubong sang Philippine National Police agud nga matuman ang mandu sang presidente.
Katuyu-an sang pagsungka sang mga anay preso amo nga maathagan ang tanan ilabi pa nga ginakwestyon sa subong ang legalidad sang paghatag sang Good Conduct Time Allowance.
