ILOILO CITY – Magapauli na lang sa uma kag magtanum sang kamote ang plano sang isa ka transient vendor sa Iloilo Central Market nga apektado sang Oplan Hawan.
Sa interview sang Bombo Radyo kay Josephine Marco, 51 anyos kag isa sa mga apektado sa Oplan Hawan, iya ginpahayag nga madugay na siya nga nagabaligya sa nasambit nga merkado.
Suno kay Marco, ginpanubli pa niya sa iya iloy ang nasambit ang pwesto kun sa diin siya nagabaligya.
Bangud sa Oplan Hawan, ginpahayag ni Marco nga wala sang kasiguraduhan kun may yara sang sayluhan nga pwesto ang mga kasubong niya nga transient vendor.
Samtang, nagapakitluoy naman ang transient vendor nga si Nely Conlu, 79 anyos, nga pangitaan siya sang pwesto nga masayluhan.
Ginpahayag ni Conlu nga naga-isahanon na lang siya sa pagpangabuhi kag ang pagbaligya sa nasambit nga merkado ang ginakuhaan niya sang inuggasto sa pang adlaw-adlaw.
Sa pagkamatuod suno kay Conlu, iya na nga ginpangayu-an sang bulig ang market in charge nga kun mahimo, indi na lang siya pagpahalinon apang wala pa mahibalu-an kun ano ang ila mangin plastada.
