ILOILO CITY – Nag-upod sa pagpatuman sang curfew for minors kagab-i si Iloilo City Police Office Director Police Colonel Martin Defensor Jr.
Sa exclusive interview sang Bombo Radyo kay Defensor, iya ginpahayag nga suportado niya ang lihok sang Iloilo City Government sa pagsikop sang mga minor de edad nga nagalagaw sa dalanon sa tion sang curfew hours.
Suno kay Defensor, ini ang isa man ka paagi agud mapasigurado ang seguridad sang mga kabataan.
Kinahanglan man suno kay Defesor nga siguraduhon ang safety sang mga nagabug-os sa composite team nga nagapatigayon sang curfew for minors bangud may yara sang mga kabataan nga nagabato sa tion nga dakpon.
Sa mga minor de edad naman nga nagasulod sa balay ilimnan, ginapangitaan ini sang Identification Cards kag kun wala sang may ipakita, ginapapauli ang mga ini.
Samtang, ginpahayag man ni Defensor nga may yara sila sang ginapahamtang nga police personnel sa palibot sang syudad sang Iloilo.
Magluwas sa mga nakadeploy sa dalanon, may yara man sang mga police personnel nga nagalibot sa merkado sa tion sang kagab-ihon.
Pagatutukan man nila suno sa natungdan ang kaso sang mga minor de edad nga ginagamit sa prostitusyon.
