ILOILO CITY – Nagabakho ang tricycle drivers nga nagadul-ong sang mga pasahero sa mga pantalan agud nga makatabok sa Guimaras.
Sa interview sang Bombo Radyo kay Larry Sanchez, 57, kag may lima ka kabataan, iya ginpahayag nga kun tayuyon ang pagbiyahe sang pump boat, nagadangat sa P1,000 ang iya kita sa tagsa ka adlaw.
Sa tion naman nga mag-untat ang biyahe sang pump boat, haluson na lang siya makakita sang P300 sa iya pagbiyahe sang tricycle.
Ang pagdul-ong sang mga pasahero sa port suno suno kay Sanchez ang nagaserbe nga palangabuhian sa madugay na nga tion.
Paagi man sa pagmaneho sang tricycle suno kay Sanchez, iya napaeskwela ang iya kabataan.
Kun tani suno sa natungdan, mabalik na sa normal ang biyahe sang pump boat agud nga maabalik naman sa kinaandan ang kita sang mga tricycle driver kasubong niya.
