ILOILO CITY – Ginareklamo sang mga manugbaligya sa Iloilo Central Market ang lusbuton nga atop, barado nga kanal kag kakulang sang suga sa nasambit nga merkado.
Sa interview sang Bombo Radyo kay alyas Gardo, isa ka manugbaligya sa nasambit nga merkado, iya ginpahayag nga sa tion nga mag-ulan, apektado ang iya benta.
Ini bangud nga suno kay alyas Gardo, nagatulo ang atop rason nga nagabaha sa area kun sa diin nahamtang ang iya pwesto lakip man sa pagasayluhan sang transient vendors.
Kun sadto suno kay alyas Gardo, nagalab-ot sa P500 ang iya makita sa sulod sang isa ka adlaw apang sa tion nga mag-ulan, mas manubo pa gid ang iya ginakita.
Magluwas sa lusbuton nga atop, isa man sa problema suno sa natungdan amo ang barado nga drainage system kag ang kakulang sang suga.
Samtang, nagpromisa naman si Mr. Ariel Castañeda, pinuno sang Local Economic Enterprise Office, nga pagaaktuhan ang reklamo sang vendors.
Suno kay Castañeda, kun tani sundon na lang sangtransient vendors ang ginapatuman nga Oplan Hawan bangud nga ini ang mandu sang presidente.
Ginpahayag ni Castañeda nga temporaryo lamang ang pagasayluhan sang vendors samtang nagapangita pa sang permanent area ang Iloilo City Government.
Tuhoy naman sa baha nga ginareklamo sang mga vendor, ginapahayag sang natungdan nga regular ang declogging operation sa mga kanal sa nasambit nga merkado.
