ILOILO – Natalana nga igadul-ong sa Sablayan Prison and Penal Farm sa Occidental Mindoro ang mga anay preso nga nahatagan sang Good Conduct Time Allowance apang nagsungka kasunod sang panawagan ni Presidente Rodrigo Duterte.
Sa interview sang Bombo Radyo kay Jail Superintendent Gilbert Peremne, Deputy Director for Administration sang Bureau of Jail Management and Penology 6, iya ginpahayag nga sa Lunes, Setyembre 16, pagadal-on na sa Sablayan Prison and Penal Farm ang 16 ka Good Conduct Time Allowance grantees nga nagsungka sa nagkalain-lain nga police station sa rehiyon.
Ginpahayag ni Peremne nga nagpakig-angot na ang Bureau of Jail Management and Penology sa Occidental Mindoro Provincial Police Office para sa pag-transport sa mga anay preso.
Pag-abot sa Sablayan Prison and Penal Farm, ginpahayag ni Peremne nga ipaidalom gilayon sa review ang records sang mga anay preso agud mahibalu-an kun husto ang pagsuma sang time credits.
Ang mandu nga nabaton sang Bureau of Jail Management and Penology amo nga dal-on sa pinakamalapit nga Bureau of Corrections office ang mga nagsungka nga ex-convicts.
