ILOILO CITY – Mangin prayoridad sang mga barangay official sang Sampaguita, Iloilo City ang pagpatukod sang Material Recivery Facility lakip na ang pagbalay sang Disaster Preparedness Plan.
Ini ang kasunod sang ginpatigayon nga Lakbay Aral sa diin pila sa mga barangay official sang nasambit nga lugar ang nag-upod.
Sa interview sang Bombo Radyo kay Brgy. Kagawad Antonio Antenor Jr., iya ginpahayag nga limitado ang espasyo sa ila lugar ilabi pa nga ikit-ikit ang mga pamalay rason nga wala sila sang Material Recovery Facility.
Suno kay Antenor, may yara na sang Memorandum of Agreement sa tunga sang barangay council kag sa tagdumalahan sang isa ka junkshop kun sa diin nila igahaboy ang recyclable materials.
Isa man ini ka pamaagi suno kay Antenor agud nga mahagan-hagan ang basura sa ila lugar.
Magluwas sa pagpatukod sang Material Recovery Facility, ginpahayag ni Antenor nga kinahanglan man nila nga magbalay sang Disaster Preparedness plan ilabi na nga fire prone area ang barangay Sampaguita.
Sa bag-o lang nagtakop nga Lakbay Aral, ginpahayag sang natungdan nga lakip sa iya natun-an amo ang tuhoy sa pagpahamtang sang One-Stop Shop agud nga mas mahapos para sa mga pumuluyo ang pagkuha sang kinahanglanon nga dukomento.
Magluwas diri, natun-an man sang natungdan nga nagakadapat man nga magpatigayon sang regular nga medical misison para sa mga pumuluyo.
