ILOILO CITY – Magapatigayon sang sunod-sunod nga aktibidad ang Girl Scouts of the Philippines may kaangtanan sa pagsaulog sang ika-70 nga anibersaryo sang nasambit nga Girl Scouting Association.
Sa interview sang Bombo Radyo kay Maryly Jane Pedroso, secretary sang Girl Scouts of the Philippines Iloilo, iya ginpahayag nga subong nga bulan sang Setyembre, ginasaulog ang Girl Scout Week celebration kag sa maabot nga Enero 2020, magasaulog naman sang ika-70 nga anibersaryo ang Girl Scout of the Philippines.
Suno kay Pedroso, may yara sang patigayunon nga Long Green Line sa Iloilo River Esplanade nga pagatambungan sang linibo ka mga girl scout sa Iloilo.
Magluwas diri, magabuhi man sang fingerling sa Iloilo River kag may yara man sang reunion kag iban pa gid nga aktibidad nga nagapakita sang solidarity kag unity sang tanan nga Girl Scout.
Sa maabot nga Setyembre 18 tubtub 22, 2019, may yara sang patigayunon nga camping sa Camp Pasica sa Dingle, Iloilo sa diin may yara man sang patigayunon nga mga aktibidad.
Ginpahayag sang natungdan nga ang ginatudlo sa Girl Scout ang kasubong nga counterpart sang formal education sa eskwelahan.
Samtang, bilang isa ka Girl Scout volunteer, ginpahayag ni Irrah Davocol, technical assistant sang Girl Scouts of the Philippines-Iloilo, nga natun-an niya ang leadership skills paagi sa pagpakigbhin sa mga aktibidad sang nasambit nga asosasyon.
Magluwas diri, ginpahayag man ni Davocol nga sa pagpakigbahin niya sa Girl Scout, nakaangkon siya sang confidence sa iya kaugalingon.
