ILOILO CITY – Madamu sang nakalinya nga aktibidad may kaangtanan sa patigayunon nga Dinagyang Festival 2020.
Kadungan sang ginpatigayon nga oathtaking ceremony sang bag-o nga set of officers sang Iloilo Festivals Foundation Inc., ginplastar ni Atty. Jobert Peñaflorida, ang presidente sang IFFI, ang mga nakalinya nga aktibidad.
Suno kay Peñaflorida, mangin tema sang Dinagyang Festival 2020 ang magasentro sa “Celebrating the Ilonggo Spirit in Honor of Señor Sto. Niño.
Ginpahayag ni Peñaflorida nga si Sto. Niño na ang mangin official mascot sang Dinagyang Festival nga sadto anay amo si Dagoy.
Sa weeklong celebration, lakip sa patigayunon nga aktibidad amo ang Ilonggo Food Festival, Miss Iloilo 2020, Tambor Trumpa Martsa Musika, Fluvial Solemn Procession, Dinagyang Floats Parade of Lights, Fireworks Display, Dagyang sa Calle Real Sadsad Brgy. Ati Tribes Street Dancing, Festive Parade, Religious Sadsad kag Dinagyang Ati Tribes Competition.
Bangud nga ginpataasan ang premyo sang mga participating tribe, ginpahayag sang natungdan nga nagalaum siya nga world class performance ang igapakita sang tagsa ka tribu.
Magluwas diri, ginpasalig man ni Peñaflorida nga mas mabatyagan sang mga Ilonggo kag sang mga dumulu-ong ang matuod-tuod nga katuyu-an sang pagsaulog sang Dinagyang Festival.
