ILOILO – Nabaton na sang Bombo Radyo Iloilo ang resolusyon sang Sangguniang Panlalawigan sang Iloilo nga nagakilala sa Bombo Lifestyle program bilang Best Public Affairs program sa 27th KBP Golden Dove Awards sang Kapisanan ng mga Brodkaster ng Pilipinas.
Ang resolution no. 2019-255 nga nagakilala sa Bombo Lifestyle ang gin-sponsor ni Iloilo 4th District Board Member Rolando Distura kag ginpirmahan nanday Iloilo 4th District Board Member Domingo Oso, Secretary to the Sanggunian Atty. Raul Tiosayco Jr. kag Vice Governor Christine Garin.
Sa interview sang Bombo Radyo kay Distura, iya ginpahayag nga ang nasambit nga resolusyon ang palatandaan sang pagkilala sang Sangguniang Panlalawigan sa maayo nga programa sang Bombo Radyo Iloilo kag makabig nga dungog sang mga Ilonggo.
Suno kay Distura, ang Bombo Lifestyle ang nagahatag sang impormasyon kag inspirasyon sa pumuluyo sa sulod sang pito na ka tuig nga pagpangalagad sang nasambit nga programa.
Ginpahayag ni Distura nga siya mismo ang isa man sa mga tagpalamati sang Bombo Lifestyle program.
Nahibalu-an nga magluwas sa 27th KBP Golden Dove Awards, finalist man ang Bombo Lifestyle bilang Best Educational Program sa 41st Catholic Mass Media Awards.
