ILOILO – Ginakabig sang Police Regional Office 6 nga seryoso nga alegasyon ang pahayag ni Philippine Drug Enforcement Agency Director General Aaron Aquino nga gina-recycle ang illegal drugs nga nakuha gikan sa drug operation.
Sa interview sang Bombo Radyo kay Police Lt. Colonel Joem Malong, tagpamaba sang Police Regional Office 6, iya ginpahayag nga nagakadapat nga may yara sang ebidensya agud nga pamatud-an ang pahayag ni Aquino.
Suno kay Malong, sa Western Visayas, iya ginapasiguro nga wala nagakatabo ang pag-recycle sang illegal drugs.
Ginpahayag ni Malong nga sa tion nga may yara sang drug operation, ginapirmahan sang witness ang pag-imbentaryo sang recoveries.
Ang witness suno kay Malong ang ginalakipan sang mga katapo sang media ukon mga barangay official sang lugar nga ginluntaran sang drug operation.
Pagkatapos sang imbentaryo suno sa natungdan, ang recoveries ang gina turn-over sa imbestigador nga amo naman ang magahatag sini sa crime laboratory kag kun may yara sang clearance gikan sa korte, iga-dispose na ang illegal drugs.
Mahimo nga mapahalin sa serbisyo ang mga katapo sang law enforcement agency nga mapamatud-an nga nagare-cycle sang illegal drugs para sa personal nga interes.
