ILOILO CITY – Duha ka mga area sa syudad sang Iloilo ang una nga tutukan sa re-activation sang Anti-Jaywalking Ordinance.
Sa interview sang Bombo Radyo kay Zella Gil, Community Affairs Officer 4 sang Special Services Unit, iya ginpahayag nga ang nasambit nga ordinansa ang gin-umpisahan sang 2016 apang nauntat ini bangud sa kakulang sang manpower gikan sa City Treasurer’s Office nga amo ang magahatag sang ticket sa mga violator.
Suno kay Gil, umpisa kahapon nga adlaw, may yara na sang duha ka team nga gin-deploy sa Diversion Road sa distrito sang Mandurriao kag sa atubang sang isa ka mall sa distrito sang La Paz agud nga magpatuman sang Anti-Jaywalking Ordinance.
Ginpahayag ni Gil nga umpisa sang gin-activate ang nasambit nga ordinansa, magamay pa lang ang nagkaladakpan nga violators.
Ang proseso suno kay Gil amo nga ang personnel sang City Treasurer’s Office amo ang magasukot sa violator sang P50 nga multa.
Samtang nagadugay, ginpahayag sang natungdan nga dugangan ang team nga iga-deploy sa palibot sang syudad sang Iloilo.
