BAROTAC VIEJO, ILOILO – Ginserbehan sang search warrant ang anay bodygurard sang pulitiko sa Barangay Santo Tomas, Barotac Viejo, Iloilo bangud sa paghupot sang indi lisensyado nga mga armas.
Ang anay bodyguard ang ginkilala nga si Cristobal Debel Jr. 52 anyos sang nasambit nga barangay.
Sa interview sang Bombo Radyo kay Pol Maj Jonathan Pinuela, chief sang Intelligence division sang Provincial Command, iya ginpahayag nga may mga na rekober nga armas sa sulod sang balay ni Debel nga ginalakipan sang isa ka unit sang 38 caliber pistol kag lima sini ka mga bala; isa ka unit sang 22 caliber pistol kag anom ka bala; fragmentation grenade; isa ka patalom; duha ka airgun; isa ka black holster kag isa ka brush knuckle knife.
Suno kay Pinuela, may nagpalab-ot sa ila sang impormasyon nga kun mahubog si Debel, nagapalupok ini sang armas kag iya pa nga ginapakita-kita ang armas sa iya kaupod sa pag-inom bilang proteksyon.
Dugang pa sang natungdan, gina-alegar nga naga pa isog-isog man si Debel sa ila nga barangay.
