CAPIZ – Ginpangunahan ni Presidente Rodrigo Duterte ang decommissioning sang 727 ka miyembro sang Rebolusyonaryong Partido ng Manggagawa-Pilipinas/Revolutionary Proletarian Army/Alex Boncayao Brigade – Tabara-Paduano Group sa Camp General Macario Peralta, Jr. sa Jamindan, Capiz.
Ang mga nasambit nga rebelde ang gikan sa Panay kag Negros kag nagsungka sa 3rd Infantry Division sang Philippine Army.
May kaangtanan naman sa pagsunod sa Clarificatory Implementing Document nga ginpirmahan sang rebelde nga grupo kag sang gobyerno sang Hulyo 19, 2019, may yara man sang disposition sa 315 ka short kag long firearms nga ginsungka sang mga rebelde.
Bilang kabahin sang decommissioning process, ang mga anay combatants ang magatinir sa 3rd ID headquarters sa Camp Peralta sa sulod sang duha ka bulan agud magpaidalom sa Community Defense Unit Training.
Kaupod sang presidente nga nagtambong sa nasambit nga kahiwatan ang pila ka mga opisyal sang pungsod kasubong nanday Sen. Christopher “Bong” Go, Department of Agriculture Sec. William Dar kag Department of Agrarian Reform Sec. john Castriciones.
Sa masobra 40 minutos nga mensahe, ginpromisa ni Duterte sa mga anay rebelde nga pagahatagan sila sang livelihood assistance paagi sa Department of Social Welfare and Development, Armed Forces of the Philippines kag National Housing Authority.
Gin-engganyo man sang presidente ang mga anay rebelde nga hingalitan ang nasambit nga bulig sang gobyerno agud nga makapangabuhi sang matarong.
Ang decommissioning sa mga anay rebelde ang kabahin man suno sa presidente sang peace process sa pungsod.
