GUIMARAS – Family Goals para sa isa ka pamilya sa Guimaras ang pagtudlo bilang propesyon.
Ini ang ginpamatud-an sang mag-asawa nga sanday Lorelyn kag Reynaldo Osano nga mga manunudlo sa kinder kag high school samtang, high school teacher naman ang ila anak nga si Loraine Christy Osano.
Sa interview sang Bombo Radyo kay Loraine Christy, iya ginpahayag nga ang kurso nga education ang iya gid nga gingusto samtang ang iya naman nga ginikanan ang iya nangin inspirasyon.
Sa masobra pa lang isa ka tuig niya nga serbisyo bilang manunudlo, ginpahayag sang natungdan nga indi mahapos ang pagtudlo bangud nga kun kaisa, kinahanglan niya nga maggasto sang personal nga kwarta agud nga may yara sang gamiton nga teaching material.
Para naman kay Reynaldo, makabig nga overworked ang mga manunudlo sa Pilipinas.
Ini bangud nga magluwas sa pagtudlo sa mga estudyante, kinahanglan pa nila nga mag-obra sang paperwork sa ila balay bilang kabahin sang ila teaching profession.
Nagakadapat suno kay Reynaldo nga may yara sang time management ang isa ka manunudlo agud nga mabalanse ang tion.
Sa pihak sini, ginpahayag ni Reynaldo nga wala sang may mabudlay kun ginapalangga ang trabaho.
Para naman kay Lorelyn, makabig nga trabahoso ang paperworks nga ginahatag sa mga manunudlo.
Bilang kinder teacher, ginpahayag ni Lorelyn nga may yara siya sang ginasunod nga blocks of time sa pagtudlo.
Suno kay Lorelyn, mas maka-focus sa pagtudlo ang isa ka Kinder teacher kun buhinan ang paperworks.
