ILOILO CITY – May yara na sang pagbag-o kun katinlo sang mga dalanon sa Western Visayas ang pagahambalan.
Ini ang may kaangtanan sa nagahilapit nga deadline sang pagpatigayon sang Oplan Hawan.
Sa interview sang Bombo Radyo kay Department of Interior and Local Government 6 Regional Director Ariel Iglesia, iya ginpahayag nga wala pa siya sang exact figures tuhoy sa assesment sang Oplan Hawan.
Suno kay Iglesia, makita man sa subong nga amat-amat na nga naghawan ang mga dalanon sa tagsa ka mga syudad kag amo man sa tagsa ka mga banwa sa rehiyon.
Ginpahayag ni Iglesia nga padayon sa subong ang pagpatigayon sang Oplan Hawan sa diin mismo si Assistant Secretary Manuel Felix ang nakasaksi nga naghawan ang mga dalanon sa syudad sang Iloilo.
Sa subong suno sa natungdan, padayon ang inventory sang ahensya tuhoy sa mga Local Government Unit nga compliant kag non-compliant.
Wala sang extension suno kay Iglesia ang plaso nga kutub na lang sa Setyembre 29 kag hatagan gid sang preventive suspension ang mga Local Chief Executive nga mapaslawan sa pagpatigayon sang Oplan Hawan.
