STA. BARBARA, ILOILO – Indi na madayon ang handum ni Cadet 4th Class Darwin Dormitorio nga mangin heneral matapos ginbawi-an sang kabuhi bangud sa hazing sa sulod sang Philippine Military Academy.
Sa exclusive interview sang Bombo Radyo kay SB Member Ramon Julius Sudosta sang Sta. Barbara, Iloilo kag himata sang biktima, iya ginpahayag nga ang amay ni Darwin nga si Ret. Col. William Dormitorio ang tumandok sang nasambit nga banwa.
Suno kay Sudosta, sang Enero subong nga tuig ang pinaka-ulihi nga pagpauli sa Sta. Barbara sang pamilya Dormitorio halin sa Cagayan De Oro kun sa diin na sila naga-istar.
Ginpahayag ni Sudosta nga malapit gid siya sa pamilya Dormitorio ilabi na kay Darwin nga nagahandum nga mangin isa ka heneral kasubong sa amay nga si William nga alumnus man sang Philippine Military Academy.
Ginapakamalaot gid sang ila pamilya suno sa SB Member ang natabo 20 anyos nga freshman student kag ila na lang nga ginatugyan sa otoridad ang pagpatigayon sang imbestigasyon.
Nagalaum man ang natungdan nga maangkon ni Darwin ang hustisya samtang nagahingyo sang privacy ang pamilya kadungan sang lubong sang biktima nga patigayunon buwas nga adlaw sa Cagayan De Oro.
