ILOILO CITY – Indi sala sang kontraktor ang atrasado nga pagtapos sang ginakay-o nga dalan sa Brgy. San Antonio, Molo, Iloilo City.
Sa interview sang Bombo Radyo kay Engr. Rodney Gustilo sang City District Engineering Office, iya ginpahayag nga ang mga service line sang Metro Iloilo Water District ang rason kun nga-a atrasado ang pagtapos sang road project.
Suno kay Gustilo, ang nasambit nga proyekto ang may timetable nga Hunyo 17 tubtub Hulyo 16, 2019 kag ang kontraktor amo ang Diamond Millenium Enterprise.
Ginpahayag Gustilo nga magluwas sa mga service line sang nasambit nga kompaniya, isa man sa nagpaatrasar sa pagtapos sang proyekto amo ang sahi sang duta nga ginakabig sandy soil.
Sa subong suno kay Gustilo, ginmanduan na ang kontraktor nga padasigon ang pagtapos sang nasambit nga proyekto.
