IGBARAS, ILOILO – Nagasanto ang record sang Igbaras PNP kag Philippine Army may kaangtanan sa recruitment sang New Peoples Army sa mga Junior kag Senior High School students sa Igbaras, Iloilo.
Ini matapos nga isa ang Igbaras sa mga banwa sa probinsya sang Iloilo nga may yara sang recruitment sang rebelde nga grupo ilabi na sa mga estudyante.
Sa interview sang Bombo Radyo kay Police Lt. Col. Jose Rommel Samson, hepe sang Igbaras Municipal Police Station, iya ginpahayag nga nagpakig-angot na siya sa 61st Infantry Batallion sang Philippine Army sa pagpamuno ni Lt. Col. Joel Benedict Batara.
Suno kay Samson, ila nga ginpadulungan ang Brgy. Igcabugao kun sa diin natabo ang engkwentro sa tunga sang militar kag sang Suyak Platoon Southern Front Komiteng Rehiyon Panay nga ginapamunu-an ni Joven Ceralvo alyas Ka Lex.
Ginpahayag ni Samson nga under control na ang area nga isa ka maligwin nga lugar apang sa pihak sini, naka-elerto ang Philippine Army.
Samtang, suno naman kay Evangelina Jala, District Supervisor sa nasambit nga banwa, wala siya sang may nabaton nga report tuhoy sa recruitment sang New People’s Army sa mga eskwelahan.
Ginpahayag ni Jala nga magapakig-angot siya sa tagsa ka school management, local government unit kag sa otoridad agud nga malikawan ang pagsalangisag.
May kaangtanan sa natabo nga engkwentro sang damlag lang, gin-pauntat ang klase sa mga lugar nga malapit sa encounter site agud nga indi maulamid ang mga estudyante kag ang mga manunudlo.
