SARA, ILOILO – Ginasiguro ni Police Regional Office 6 Director Police Brig. Gen. Rene Pamuspusan nga magapangatubang ang nagakaigo nga kaso ang tatlo ka mga pulis sa natabo nga pagkapatay sang 26 anyos nga lalaki sa Zerrudo, Sara, Iloilo sa tion nga matukiban nga may salabton ang mga pulis.
Ang biktima amo si Adonis Hontiveros sang Ajuy, Iloilo.
Samtang ang tatlo naman ka mga pulis amo sanday atrolman Christopher Paclibar, Police Corporal John Michael Parsia kag Police Corporal Alfredo Bartulo.
Sa interview sang Bombo Radyo kay Gen. Pamuspusan, iya ginpahayag nga padayon ang imbestigasyon nga ginahimo sang Iloilo Police Provincial Office agud nga mahibaluan ang matuod nga natabo sa ginapahayag pagpalagyo ni Hontiveros sa checkpoint.
Suno kay Pamuspusan, indi pa mapat-od kun ano nga kaso ang ipasaka sa mga pulis bangud wala pa resulta ang imbestigasyon.
Dugang pa sang natungdan, mangin patas ang imbestigasyon sa tunga sang mga kapulisan kag ang lalaki nga natiruhan,
Nahibaluan nga gin-relieve na sa pwesto ang tatlo ka mga pulis kag yara sa kustodiya sang Sara Municipal Police Station.
