ILOILO CITY – Gin-athag sang market-in-charge sang Iloilo Terminal Market nga natigayun na nila nga napangguba ang mga palahuwayan sang mga manugbaligya sa merkado nga una na nga ginpahayag ginahimo nga sex den sang mga minor de edad.
Sa interview sang Bombo Radyo kay Mr. Eric San Agustin, market-in-charge sang nasambit nga merkado, iya ginpahayag nga nagapangguba na ang mga palahuwayan kag nahawananan na ang sulod sang merkado.
Magluwas diri suno kay San Agustin, pagpatak sang 6:00 sa kasisidmon, ginasirado na ang mga alagyan sa merkado kag isa na lang ang nagapabilin nga bukas.
May yara naman sang nagabantay nga mga auxillary police sa merkado kag may police man nga naga duty sa compac station agud magresponde sa tion sang emerhensya.
Smatang, magapakigsapol ang Iloilo City Government sa mga nagapanag-iya sang computer shops sa palibot sang syudad sang Iloilo.
Ini ang may kaangtanan sa mga minor de edad nga madakpan sa curfew for minors.
Sa interview sang Bombo Radyo kay Nestor Canong, pinuno sang Task Force on Moral and Values Formation, iya ginpahayag nga ini ang ila lihok sa pagpasangkad sang curfew sa syudad.
Suno kay Canong, pila sa ila nadakpan nga mga minor de edad ang nagahalin sa mga computer shop sa palibot sang syudad.
May apat naman ka computer shops ang ila ginpasarado sa Iloilo Terminal Market sa diin nadakpan sang damlag lang ang apat ka mga minor de edad.
Nagahingyo man ang natungdan sa mga ginikanan nga kun tani bantayan ang ila kabataan bangud ang pila sa computer games ang makapaguba sa pagtuon sang isa ka bata.
