ILOILO CITY – Ginalauman nga magabiyahe na sa mga masunod nga semana ang modernized jeepney sa syudad sang Iloilo bilang kabahin sang Modernization Program sang gobyerno.
Sa interview sang Bombo Radyo kay Rizalito Alido, presidente sang Iloilo City Alliance of Operators and Drivers Transport Cooperative, iya ginpahayag nga may yara na sang pito ka initial unit ang una nga magabiyahe sa diin 28 ka unit ang ginaprobahan para sa ila kooperatiba.
Suno kay Alido, ginaproseso na lang nila ang pila sa mga rekisitos sa Land Transportation Office kag kun matapos na, mahimo na nga makabiyahe ang mga modernized jeepney.
Ginpahayag ni Alido nga ang pagsweldo sa mga driver sa ila kooperatiba ang nasanto sa Labor Code sa diin magluwas sa fixed nga sweldo, may mga benepisyo pa nga igahatag sa driver.
Ang ruta sang modernized jeepney amo ang Ungka ITGSI tubtub sa Parola Wharf vice versa sa diin ang regular fare halin sa terminal padulong sa Fort San Pedro ang nagalab-ot sa P17.10 samtang P13.68 ang discounted fare.
