ILOILO CITY – Magapatigayon sang motu propio investigation ang Iloilo Police Provincial Office-Internal Affairs Service sa natabo nga pagluthang patay sa 26 anyos nga lalaki sa checkpoint sa Zerrudo, Sara, Iloilo.
Ang biktima amo si Adonis Hontiveros, 26, sang Pinantan Elizalde, Ajuy, Iloilo.
Sa interview sang Bombo Radyo kay Pol. Maj. Manny Manuel, pinuno sang Provincial Internal Affairs Servic, iya ginpahayag nga kuhaon nila ang magkatimbang nga bahin agud nga mahibaluan ang matuod nga natabo.
Indi man masabat ni Manuel kun ngaa sa atubang nga bahin ang igo sang armas kay Hontiveros apisar nga ginapahayag nalagyo sa checkpoint ang biktima.
Ginasiguro lang sang hepe nga imbestigahan man ang tatlo ka mga pulis nga nagpatigayon sang checkpoint kag ginapahayag naglagas kay Hontiveros nga sanday Patrolman Christopher Paclibar, Police Corporal John Michael Parsia kag Police Corporal Alfredo Bartulo.
Suno kay Manuel, base sa panaysayon man sang pipila ka mga residente sa Zerrudo, Sara, may yara sang checkpoint nga ginpatigayon sa ila lugar.
Mismo ang Internal Affairs Service man ang mahibalo kun may yara sang administrative liability ang tatlo ka mga pulis sa natabo.
Sa subong, yara sa Camp Martin Delgado ang tatlo ka mga pulis matapos nga ginkustodiya sa Sara Municipal Police Station.
Una na nga ginpahayag ni Pol. Lt Col. Mario Baquiran Jr., commander sang 2nd Iloilo Provincial Mobile Force Company, nga nag-una palupok sang armas si Hontiveros sa mga kapulisan.
Apang nagapanindugan man ang iloy sang biktima nga si Selda Hontiveros kag ang kaupod sini sa motorsiko nga si Alyas Boy nga wala sang armas si Adonis.
Nahibaluan nga wala sang criminal record ang biktima kag bread winner man ini sang pamilya sa diin siya ang naga-gasto sa pag-eskwela sang iya duha ka mga manghod.
