ILOILO CITY – May yara sang nanari-sari nga aktibidad ang mga senior citizen sa syudad sang Iloilo may kaangtanan sa Elderly Week Celebration.
Ang Elderly Week Celebration ang maga-umpisa sa Oktubre 1 tubtub 7, 2019 kag may tema nga “Healthy and Productive Aging Starts With Me”.
Sa interview sang Bombo Radyo kay Dr. Elpidio Locsin, Executive Vice President sang Federation of Senior Citizens Association of the Philippines Iloilo City, iya ginpahayag nga sa sulod sang isa ka semana, madamo ang mga nakalinya nga aktibidad bilang pagkilala sa mga senior citizen.
Suno kay Dr. Locsin, sa Oktubre 1, 6:00 sa aga, may patigayunon nga fun walk sa diin 100 ka senior citizen ang magapakigbahin.
Sa Oktubre 2, may yara sang thanks giving mass nga patigayunon sa Molo Church kag pagasundan sang motorcade samtang may yara sang choir and folk dance regional competition sa diin may yara sang cash prize nga igahatag kag may yara man sang Agri forum nga patigayunon sa Oktubre 3.
Sa Oktubre 4, may yara sang patigayunon nga Technology Transfer and Sharing Organic Farming kag sa Oktubre 5 tubtub 6, may yara sang Culmination activities nga patigayunon.
Sa Oktubre 7, may yara naman sang patigayunon nga awarding ceremony sa mga centenarian.
Samtang, para naman kay Engr. Rodrigo Naval, ang presidente sang nasambit nga asosasyon, tuman ka malahalon para sa ila ang pagpatigayon sang Elderly Week Celebration.
Suno kay Engr. Naval, ini ang tion para sa pagkilala kag paghatag sang igtalupangod sa mga kasubong niya nga mga senior citizen.
Ginpahayag ni Engr. Naval nga diri sa syudad sang Iloilo, 20 ka tuig na humalin sang gintukod ang ila asosasyon.
