ILOILO – Ang pagpasangkad sang K to 12 curriculum ang pagatutukan sang bag-o nga Schools Division Superintendent sang Iloilo.
Ini ang kasunod sang pag curtersy ni Dr. Roel Bermejo kay Iloilo Governor Arthur “Toto” Defensor Jr. kadungan sang pag-umpisa sang iya termino epektibo subong nga adlaw.
Sa interview sang Bombo Radyo kay Bermejo, iya ginpahayag nga mangin sentro sang iya nga pagpamuno bilang schools division superintendent amo ang pagpaayo sang kalidad sang pagtudlo sa Junior kag Senior High School students.
Ginpasalig man ni Bermejo nga iya gid nga suportahan ang anu man nga proyekto nga ipatukod ni Gov. Defensor kun edukasyon ang pagahambalan.
Samtang, indi pa makahatag sang pahayag si Bermejo tuhoy sa ginapahayag recruitment sang New People’s Army sa Junior kag Senior High School Students sa probinsya sang Iloilo.
Suno kay Bermejo, luyag niya anay nga magpatigayon sang imbestigasyon ilabi pa nga bag-uhanon siya diri sa Iloilo.
Nahibalu-an nga ini na ang ika-apat nga assignment ni Bermejo bilang Schools Division Superintendent.
Si Bermejo ang anay na-assign sa Capiz kag iya ginbuslan si Dr. Miguel Mac Aposin nga gin-assign na sa Aklan.
