ILOILO – Ang pagtapna sang insurhensya sa Iloilo ang nangin sentro sang topiko sa ginpatigayon nga Provincial Peace and Order Council meeting nga ginpangunahan ni Iloilo Gov. Arthur Defensor Jr.
Sa ginpatigayon nga pagsinapol, nagtambong man ang mga nanari-sari nga stakeholders kasubong sang mga tiglawas sang Department of Interior and Local Government, Iloilo Police Provincial Office, Philippine Army, Department of Agrarian Reform, National Bureau of Investigation kag Department of Education.
Sa interview sang Bombo Radyo kay Brigadier General Alberto Desoyo, commander sang 301st Infantry Battalion sang Philippine Army, iya ginpahayag nga nakasugtan sa pagsinapol nga magtukod sang task force nga magatutok sa pagtapna sang local community armed conflict.
Suno kay Desoyo, ang pagtukod sang nasambit nga task force ang paagi sa pagdihon sang resolution bilang sabat sa executive order ni Presidente Rodrigo Duterte nga nagamandu sa pagtukod sang national task force nga amo ang magatutok sa pagtapna sang insurhesya sa pungsod.
Ginpahayag ni Desoyo nga ang provincial peace and order council ang yara sa idalom sang Department of Interior and Local Government samtang ang peace and development council ang yara naman sa idalom sang National Economic and Development Authority.
Sa bahin sang Armed Forces of the Philippines, ginpahayag ni Desoyo nga magapatigayon sila sang community support program bilang kabahin sang lihok sang gobyerno agud matapna ang insurhesya.
