ILOILO CITY – Nagapangatubang sang sampaw-sampaw nga kaso kriminal kag administratibo sa Office of the Ombudsman sanday Iloilo City Mayor Jerry Treñas kag apat ka empleyado sang Iloilo City Hall.
Kaso nga Grave Coercion, Anti-Graft and Corrupt Practices Act, Grave Misconduct kag Oppression ang ginpasaka sang tagreklamo nga si Rosita Celiz Camacho sang Zone 2, San Juan, Molo, Iloilo City kag Special Operations Officer 3 sa Iloilo City Hall.
Santo sa complaint affidavit ni Camacho, nakasaad nga sanday Treñas, Iloilo City Administrator Melchor Tan, Executive Assistant kag Assistant Iloilo City Administrator Noel Panaguiton, Iloilo City Government Assistant Department Head 2 Josephine Agudo kag Iloilo City Human Resource
Management Officer Leo Elevencione bangud sa paghimbunanay sang nakaligad nga May 13 midterm elections.
Suno kay Camacho, antes pa man ang eleksyon, makapila ka beses nga namitlang ang iya pangalan sa tagsa ka ginabuy-an nga pahayag ni Treñas.
Ginpahayag ni Camacho nga gin-angot siya nga nagsuporta kay anay Iloilo City Mayor Jose Espinosa III kag ginatudlo nga bagwoman sang anay alkalde sa P100 million nga kantidad bilang kabaylo sa indi pagkontra kay Treñas sa pagka-alkalde.
Nakasaad man sa complaint affidavit ni Camacho nga ginpatawag siya nanday Tan, Elevencione, Agudo kag Panaguiton tuhoy sa luyag ni Mayor Treñas nga mag-leave siya sa sulod sang anum ka bulan bangud nga luyag sang alkalde nga maka-angkon sang peace of mind.
Ginpahayag man sang natungdan nga gin-ubos niya sa pag-avail ang iya leave credits kag sang naubos na, ginapilit siya nga mag-leave tubtub sa anum ka bulan.
Nakabatyag siya sang anxiety suno kay Camacho bangud sa pagproblema kun sa diin makuha sang inuggasto para sa kinahanglanon sang iya pamilya bangud nga wala siya sang sweldo sa sulod sang anum ka bulan.
Nagpangayo sang legal advice si Camacho kag nadesisyunan nga magpasaka sang kaso batok sa mga nasambit nga opisyal sang Iloilo City Government.
Wala pa nakahatag sang sabat ang mga tagreklamo kag ang mga ginareklamo tuhoy sa nasambit nga isyu.
