ILOILO CITY – Pagamultahan ang mga market vendor nga nagalapas sa market ordinance tuhoy sa waste disposal kag waste segregation sa tanan nga merkado sa syudad sang Iloilo.
Sa interview sang Bombo Radyo kay Ariel Castañeda, pinuno sang Local Economic Enterprise Office, iya ginpahayag nga may yara sang guidelines nga ginapatuman sa mga merkado humalin sadto.
Suno kay Castañeda, magluwas sa pagmulta sang P1,000 sa mga market vendor, mahimo man nga mapahalin sa pwesto ang mga market-in-charge nga wala nagatrabaho sang maayo.
Ginhalimbawa ni Castañeda ang Material Recovery Facility sa Iloilo Terminal Market nga nagaserbe na nga halabuyan sang basura sang mga pumuluyo gikan sa mga kaiping nga barangay.
Sa nasambit nga Material Recovery Facility, ginpahayag sang natungdan nga may yara sang nagabantay agud nga masiguro nga ginaputos sa plastic ukon sako ang mga basura kag na-segregate na sang maayo apang sa tion nga maghakot ang haulers, indi man malikawan nga mag-inukay ang mga basura.
