ILOILO – Ginpatuman na ang bag-o nga duty scheme sang mga pulis sa Iloilo Police Provincial Office.
Sa interview sang Bombo Radyo kay Iloilo Police Provincial Office Director Police Colonel Roland Vilela, iya ginpahayag nga sa baylo 24 ka oras nga duty sang tagsa ka pulis, mangin dose ka oras na lamang ini.
Suno kay Vilela, ini ang kabahin sang iya flagship program nga Optimization of Enhanced Managing Police Operation.
Ginpahayag ni Vilela nga na obserbahan niya nga wala sang may naga duty kun gab-i sa mga Highway Police Assistance Desk bangud nga natuyo man ang mga pulis.
Kadungan sa paglibot ni Vilela sa mga police station, nagpatigayon siya sang briefing sa mga pulis may kaangtanan sa pagpatuman sang duty scheme.
Samtang, gin relieve naman si Police Major Fernand Limbungan, hepe sang Sta. Barbara Municipal Police Station bangud sa indi pagsunod sa duty scheme.
Sa pagpaathag ni Vilela, na obserbahan niya nga wala sang tawo sa Highway Police Assistance Desk bangud nagakatulog na ang mga pulis gikan sa 24 oras nga pagtrabaho.
Ginpaandaman man sang director ang iban pa ka mga hepe sa probinsya sang Iloilo nga nagakadapat sundon ang bag-o nga duty scheme.
