ILOILO CITY – Waiting shed, poste sang kuryente kag kahoy sang Acacia ang nabilin nga obstruction sa Q. Abeto St, Abeto-Mirasol, Mandurriao, Iloilo City.
Sa interview sang Bombo Radyo kay Punong Barangay Ramon Sampiano Amoroso sang nasambit nga lugar, iya ginpahayag nga 90% tubtub 95% ang accomplishment kun Oplan Hawan ang pagahambalan
Suno kay Amoroso, ang mga nabilin nga obstruction ang indi madali nga makuha rason nga iya nga ginhingyo ang bulig sang Public Safety and Transportation Management Office agud nga makuha ini gilayon.
Ginpahayag ni Amoroso nga wala na sang obstruction sa mga mayor dalanon sa ila lugar.
Kun tuhoy naman sa kalimpyo ang pagahambalan, ginpahayag ni Amoroso nga padayon ang pagpaninlo agud nga matapna ang Dengue Hemorrhagic Fever sa diin ang ila barangay sadto ang isa sa mga lugar nga may pinakamadamo nga kaso sang nasambit nga balati-an.
Samtang tuhoy naman sa ginaduso nga dapat iseparar ang babayi kag lalaki nga estudyante agud matapna ang teenage pregnancy, ginpahayag ni Amoroso nga bilang isa ka amay, nakadepende sa ginikanan ang pagdisiplina sa mga kabataan.
Suno kay Amoroso, indi dapat obligado ang pagpatuman sang nasambit nga pagsulundan ilabi na sa elementary pupils.
Kun madayon gid man suno sa natungdan, mas maayo nga ini ang ipatuman sa High School kag College student ukon ang mga yara sa legal nga edad.
