ILOILO CITY – Igaduso ni Iloilo City Councilor Alan Zaldivar sa Sangguniang Panlungsod ang pagtukod sang Local Cooperative Unit sa syudad sang Iloilo.
Sa interview sang Bombo Radyo kay Zaldivar, chairman sang Committee on Cooperative and Livelihood, iya ginpahayag nga kadungan sang sesyon sang Iloilo City Council, iya iduso nga magtukod sang Local Cooperative Unit nga amo ang magatutuk sa mga kooperatiba.
Suno kay Zaldivar, nagalab-ot sa 130 ang kooperatiba apang iban sini ang indi na aktibo samtang ang iban naman ang indi compliant sa mandu sang gobyerno.
Ginpahayag ni Zaldivar nga ang pagtukod sang kooperatiba ang kasubong sang community organizing nga dapat ginahandaan sang maayo.
Sa pagpaathag ni Zaldivar, pagkatapos nga matukod ang isa ka kooperatiba, kinahanglanon ang financial support lakip na ang pagpaidalom sa
training sa mga miyembro.
Importante man suno sa natungdan nga ginasunod ang good values agud nga mangin mapag-on ang kooperatiba.
Samtang, may kaangtanan diri, nagasentro naman sa pagtipig sang palibot ang team sa pagsaulog sang National Cooperative Month subong nga bulan sang Oktubre.
Sa interview sang Bombo Radyo kay Al Avon Jay Francisco, chairman sang Regional Cooperative Development Council, iya ginpahayag nga ang team subong nga National Cooperative Month amo ang COOPERATIVISM: A Countervailing Force Against Climate Change and Violent Extremism through People Empowerment to Trailblaze Shift in Paradigm Towards Sustainability and Social Inclusion”.
May kaangtanan diri, ginpahayag ni Francisco nga may yara sang fun run nga patigayunon sa Sabado, Oktubre 12 sa Iloilo Freedom Grandstand, Iloilo River Esplanade padulong sa Iloilo Provincial Capitol kag pabalik sa point of origin.
Magluwas diri, may yara man sang flower planting activity, zumba kag feeding program nga patigayunon.
Suno kay Francisco, indi man mahinago nga daku ang nabulig sang kooperatiba sa pagpa-uswag sang ekonomiya sang pungsod.
