ILOILO CITY – May yara sang fixed deployment ang beat policemen sang La Paz Police Station.
Sa interview sang Bombo Radyo kay Police Major Mark Evan Salvo, hepe sang La Paz Police Station, iya ginpahayag nga may yara sang tatlo ka area kun sa diin ang deployment sang beat policemen.
Suno kay Salvo, lakip diri amo ang sa Luna St. sa diin napahamtang ang isa ka daku nga mall sa distrito sang La Paz, may yara man sa fastcraft terminal kag sa Brgy. Ingore.
Tuhoy naman sa numero sang beat policemen kag oras sang delpoyment, ginpahayag ni Salvo nga indi niya ini mahimo nga iwaragwag bangud sa security purposes.
Ginpahayag ni Salvo nga kun may yara sang delpoyment sang beat policemen, mahagan-hagan ang nagakatabo nga krimen kag may yara sang dangpan ang mga pumuluyo nga nagakinahanglan sang bulig.
Samtang, nagpamalibad naman si Police Lt. Benjie Ballejera, hepe sang Arevalo Police Station, nga maghatag sang specific information tuhoy sa beat policemen sa distrito sang Arevalo.
Suno kay Ballejera, indi niya mahimo nga iwaragwag kun pila ka bilog, diin ang delpoyment kag kun ano oras ang shifting sang beat policemen bangud nga makabig ini nga confidential.
Sa pihak sini, ginpahayag ni Ballejera nga aktibo ang beat policemen sa nasambit nga distrito.
