ILOILO CITY – Nangin malip-ot apang maunod ang sabat ni Iloilo City Mayor Jerry Treñas batok sa mga nagapakamalaot sa iya pagpamuno sa syudad sang Iloilo.
Tuhoy sa mga kaso nga ginpasaka batok sa iya, ginpahayag ni Treñas sa Bombo Radyo nga lunsay lamang ini pagpangguba.
Suno kay Treñas, ang mga pagpangguba sa iya ang indi makalapaw sa kaayuhan nga iya ginhimu para sa syudad sang Iloilo.
Ginpahayag sang alkalde nga magapadayon siya sa pagserbisyo sa mga pumuluyo kag indi maapektuhan sang mga negatibo nga komento ang iya trabaho.
Samtang, wala naman sang plano si Treñas nga magpakig-istorya sa empleyado nga si Rosita Celiz Camacho, ang Special Operations Officer 3 sang Iloilo City Hall nga amo ang nagpasaka sang sampaw-sampaw nga kaso batok sa iya sa Office of the Ombudsman.
Suno kay Treñas, wala na sila sang dapat nga hambalan pa ni Camacho nga supporter ni anay Mayor Jose Espinosa III.
Ginpanindugan man ni Treñas nga bagwoman ni Espinosa si Camacho kun P100 million nga deal ang pagahambalan.
Ang nasambit nga deal ang ginpahayag natabo antes pa man ang May 13 midterm elections, sa diin indi na magkontra sa pagka-alkalde si Espinosa kabaylo sang nasambit nga kantidad.
