ALIMODIAN, ILOILO – Indi na magbalik sa luwas sang pungsod ang Ilongga Overseas Filipino Worker nga ginmaltrato sang iya employer sa Saudi Arabia.
Ini matapos nga nakapauli na sa Pilipinas ang Ilongga Overseas Filipino Worker nga si Joylyn Bracamonte sang Brgy. Sulong, Alimodian, Iloilo.
Sa interview sang Bombo Radyo kay Bracamonte, iya ginpahayag nga nag-umpisa ang pagsakit sa iya sang gintuyo siya nga himuslan sang iya employer nga lalaki.
Suno kay Bracamonte, sa baylo nga apinan sang employer nga babayi, ginasakit pa siya, ginbunggo sa dingding kag ginpreso sa kwarto sang iya amo bangud sa paggamit sang cellphone kag ginpatu patu-an nga nagguba sang wifi nga nagakonekta sa ila Closed Circuit Television camera.
Ginpahayag ni Bracamonte nga nagpangayo siya sang bulig sa iya agency nga Step Up International Manpower Services apang makaligad sang pila ka adlaw, wala sa gihapon sang aktu kag nagapadayon sa gihapon ang pagpanakit sang iya employer.
Sa dalayon niya nga pagpakit-luoy sa iya mga employer, ginpahayag ni Bracamonte nga ginswelduhan siya kag ginbaklan sang plane ticket agud nga makapauli.
Sa pagkamatuod suno sa natungdan, mas malala pa gid ang gina-agyan subong sang ginabanta 4 niya ka kaupod nga Overseas Filipino Worker sa Saudi Arabia nga nagakinahanglan sang bulig agud nga makapauli.
Desidido naman si Bracamonte nga pasakaan sang kaso ang iya mga employer.
