ILOILO CITY- Nagapadayun ang preparasyon sang Iloilo Festivals Foundation Incorporated para sa pagpadigayun sang level up Iloilo Dinagyang 2020, 360 degrees .
Sa interview sang Bombo Radyo kay Atty. Jobert Peñaflorida, Presidente sang IFFI, iya ginpahayag nga pila na kabulan ang ginahimo nga preparasyon sang IFFI agud mangin madinuagun kag memorable ang palaabuton nga Dinagyang Festival.
Suno kay Peñaflorida, nahitsu na ang 12 ka mga events para sa Festival nga magasugod sa Enero 18 tubtob 26, 2019.
May yara man sang artistic committee nga magapasiguro sang world class nga performance sang tagsa ka mga tribu.
Sa bahin naman sang ticket suno sa iya, nagpakig-angot na sila sa mga accredited hotels kag travel agencies agud masigurado nga mahatagan sang ticket ang mga bisita.
Narelease naman ang partial subsidy sang mga tribu kag sa diin nga makita na ang ila full performance antes sang Dinagyang, igarelease na ang full subsidy sang mga ini.
Ang mga tribu ang ginalakipan sang Tribu Panayanun sang Iloilo City National High School, Tribu Baryohanon sang Barrio Obrero National High School, Tribu Salugnon sang Jaro National High School, Tribu Paghidaet sang La Paz National High School, Tribu Hugponganon sang Ana Ros Village, Tribu Dagatnon sang Ramon Avanceña National High Schoolm, Tribu Ilonganon sang Jalandoni National High School kag Tribu Binhi sang Melchor Java National High School.
May yara naman sang apat ka mga judging areas nga ginalakipan sang Freedom Grandstand, Maria Clara, Solis Street kag Ledesma kag Valeria Street.
Subong nga adlaw la 1:00 sang hapon may yara sang 100 days countdown sang Iloilo Dinagyang nga patigayun sa Festive Walk sa distrito sang Mandurriao.
