ILOILO – Nagapabilin nga high morale ang Philippine National Police sa pihak sang kontrobersiya tuhoy sa ninja cops sa diin naangot si PNP Chief Police General Oscar Albayalde.
Sa interview sang Bombo Radyo kay Iloilo City Police Office Director Police Colonel Martin Defensor Jr., iya ginpahayag nga wala sang epekto sa bug-os nga hanay sang Iloilo City Police Office ang ginakaulamiran nga kontrobersiya ni Ablayalde.
Suno kay Defensor, iya makita ang energy kag enthusiasm sang tagsa ka police officer sa pagtrabaho.
Ginpahayag ni Defensor nga para sa iya, nangin maayo nga pinuno kag isa ka maayo nga tawo si Albayalde.
May kaangtanan diri, ginpahayag sang natungdan nga kun tani, untatan na ang pagpalapnag sang sala nga impormayson batok sa mga pulis kag hulaton na lang ang resulta sang imbestigasyon.
Samtang, suportado sang Police Regional Office 6 si Philippine National Police Chief Police General Oscar Albayalde.
Sa interview sang Bombo Radyo kay Police Regional Office 6 Director Police Brigadier General Rene Pamuspusan, iya ginpahayag nga sa subong, si Albayalde sa gihapon ang pinuno sang tanan nga pulis kag wala pa man sang direct evidence nga makapamatuod nga naangot sa ninja cops ang PNP Chief.
Suno kay Pamuspusan, sila sa Police Regional Office 6 ang padayon nga magasuporta kay Albayalde kag magapadayon sa pagtrabaho.
Ginpahayag ni Pamuspusan nga sa pihak sang kontrobersiya, magapabilin nga mabaskog ang hanay sang Philippine National Police.
Nagapati man ang natungdan nga malampuwasan ni Albayalde ang ginapangatubang nga kontrobersiya.
