LAMBUNAO, ILOILO – Gintinguhaan pa sang driver nga ilikaw agud nga indi makabunggo sa kahoy ang depampasahero nga jeep nga naaksidente sa Brgy. Maribong, Lambunao, Iloilo.
Ini matapos nga apat sa 40 ka mga sakay sang depampasahero nga jeep ang naka-angkon sang patal nga pilas sa diin isa naman ang nautdan sang kamot bangud sa nasambit nga aksidente.
Sa interview sang Bombo Radyo kay Ivy Sumande, 55, sang Brgy. Cunarum, Lambunao, Iloilo kag driver sang depampasahero nga jeep, iya ginpahayag nga bag-o pa man naghalin sa garahe, iya gid nga gin-check ang kondisyon sang salakyan.
Suno kay Sumande, kampante siya nga wala sang guba ang depampasahero nga jeep apang sang nagapadulong na sila sa camping site sa Brgy. Maribong, hinali lang nga nadulaan sang preno ang salakyan.
Ginpahayag ni Sumande nga iya pa nga ginpanugyanan ang mga pasahero nga indi magsalangisag bangud nga iya tinguhaan nga mapapondo ang salakyan nga indi na makadulhog sa banglid kag makabunggo sa mga kahoy ukon poste sang kuryente.
Sa pagkamatuod suno kay Sumande, sa kadugayon niya nga nangin driver sang depampasahero nga salakyan, ini ang labing una nga tion nga naulamid siya sa aksidente.
Sa pihak sini, ginpahayag sang natungdan nga mahimo nga gintuyo sang biktima nga si Mary Jane Jaque nga maglumpat sa jeep rason nga nautdan ini sang kamot.
Nahibalu-an nga sakay sa nasambit nga jeep ang 40 ka mga pasahero nga ginalakipan sang mga estudyante sang Panuran Elementary School, manunudlo kag parents/guardians nga magapadulong kun tani sa district camping sang Boy Scout of the Philippines sa Brgy. Maribong sang natabo ang aksidente.
