ILOILO CITY – Ginakabig ni Iloilo City Mayor Jerry Treñas nga indi salapakon ang reklamo nga ginpalab-ot sa iya tuhoy sa ginapahayag kurapsyon nga ginakaulamiran sang pila ka mga empleyado sang Iloilo City Hall.
Ini ang kasunod sang ginpadala nga sulat ni certain Juan Dela Cruz kay Treñas tuhoy sa ginapahayag kabulastugan nga ginahimo nanday Executive Assistant Francis Te, Executive Asst. for Barangay Affairs Jose Fernando “Boyet” Rico kag City Budget Officer kag Beautification Head Ninda Atinado.
Ang nasambit nga sulat ang napetsahan sang Setyembre 1, 2019 sa diin si certain Juan Dela Cruz amo man ang nagpadala sang sulat kay Treñas tuhoy sa ginapahayag 180 ka peke nga kasal nga ginrehistro sa Local Civil Registry.
Sa interview sang Bombo Radyo kay Treñas, iya ginpahayag nga nagakadapat nga pamatud-an sang tagreklamo ang mga akusayson batok sa tatlo ka mga empleyado sang Iloilo City Hall paagi sa pagpasaka sang kaso.
Suno kay Treñas, ang una nga reklamo nga ginpalab-ot ni certain Juan Dela Cruz ang napamatud-an sa diin nagapadayon ang imbestigasyon kag napasakaan na sang kaso si Local Civil Registry Head Mr. Juncae Manikan.
Ginpahayag ni Treñas nga kun may yara sang kaso, iya nga sabton kag ipausisa kun bala matuod ang akusayson batok kanday Rico, Te kag Atinado.
Sa subong suno sa alkalde, maathag nga fake letter ang ginpadala sa iya kag ginlahog pa niya ang nagpadala sang sulat nga mag move-on na bangud nga madugay na nga natapos ang eleksyon.
