JAPAN – Nagpaguwa sang abiso ang Department of Foreign Affiars lakip man ang Japan Government sa tanan nga pumuluyo nga mag-aligmat kadungan sang paglaslas ni Typhoon Hagibis sa Japan.
Santo sa weather forecast, ginalauman nga maga-landfall sa Japan si Hagibis buwas nga adlaw.
Sa interview sang Bombo Radyo kay Bombo International Correspondent Josel Palma direkta sa Japan, iya ginpahayag nga ginalauman nga tuman ka baskog ang Typhoon Hagibis ukon may local name nga Typhoon 19 nga kasubong sang bagyo nga naglaslas sang 1958.
Suno kay Palma, umpisa sang mga nakaligad nga inadlaw, may panic-buying na nga natabo bangud man sa kahangawa sang mga pumuluyo.
Ginpahayag ni Palma nga magluwas sa pagtipon sang mga pagkaon, tubig kag emergency kit, ginpanugyanan man ang mga pumuluyo ilabi na sa
mga lugar malapit sa baybayon kag sa mga matag-as nga lugar nga mag-evacuate agud makalikaw sa epekto sang tsunami ukon landslide.
Sa subong, kanselado na ang transport services sa Japan may kaangtanan sa paglaslas sang Typhoon Hagibis.
