ILOILO CITY – Wala pa sang petsa kun san-o ang masunod nga committee hearing tuhoy sa pagpabutyag sang duha ka transport company nga mag-invest sa syudad sang Iloilo.
Ini ang kasunod sang ginpatigayon nga committee hearing sa diin ang Grab lang ang nakatambong samtang nagdesisyon naman ang Transit X nga ipaiway ang hearing.
Sa interview sang Bombo Radyo kay Iloilo City Councilor Ely Estante, vice chairman sang Committee on Transportation sa Iloilo City Council, iya ginpahayag nga sa ginpatigayon nga committee hearing, gin-istoryahan ang tuhoy sa bentaha kag disbentaha sang pag-invest sang Grab.
Suno kay Estante, ginplastar sang tagsa ka resource person ang ila mga sentimiyento tuhoy sa paghatag sang endorsement sa nasambit nga transport company ilabi pa nga may yara na nga daan sang ginabanta 500 ka existing Grab taxi units.
Ginpahayag ni Estante nga luyag pa nila nga magpatigayon sang committee hearing antes hatagan sang endorsement ang Grab nga nagahingyo sang dugang nga 800 units.
Sa pihak sini, ginpahayag sang natungdan nga bisan indi pa maghatag sang endorsement ang Iloilo City Council apang ang Land Transportation Franchising and Regulatory Board naman ang magadesisyon kun hatagan sang prangkisa ukon indi ang nasambit nga transport company.
Nahibalu-an nga magluwas sa Grab, nagpabutyag man ang Transit X nga magpahamtang sang cable car sa syudad.
