ILOILO CITY – Madamo nga factors ang rason sa pag-angkon sang breast cancer.
Sa interview sang Bombo Radyo kay Dr. Anita Lacuesta Jesena isa ka Oncologist, iya ginpahayag nga ang breast cancer ang masami nga nagatuhaw sa mga babayi.
Suno kay Dr. Jesena, ang breast cancer ang nagalagas sa lung cancer bilang nagapanguna nga rason sang kamatayon sa kalibutan.
Ginpahayag ni Dr. Jesena nga ang nasambit nga balati-an ang mahimo tuga sang hormonal factors, genetic mutations, tuman nga exposure sa radiation, obesity ukon tuman nga katambukon, pagbag-o sang lifestyle kag kun ang isa ka babayi ang wala naka-agi sang paminata.
Ang breast cancer suno kay Dr. Jesena ang mahimo nga matapna kun mahibaluan gilayon paagi sa breast self-examination.
Ang pinaka-epektibo nga pagpatigayon sang breast self-examination amo ang tatlo ka adlaw pagkatapos sang pamulanon.
Para naman sa mga nag-menaupause na, mahimo nga magpatigayon sang breast self-examination sa una nga adlaw sang tagsa ka bulan.
Mas importante man suno sa natungdan nga magpakunsulta gilayon sa medical experts agud nga makapaidalom sa treatment.
Emosyonal ang isa ka breast cancer survivor samtang ginakaigbahin ang iya gin-agyan agud nga malampuwasan ang pagtilaw sa iya kabuhi.
Sa interview sang Bombo Radyo kay Ma. Emma Ingalla, breast cancer surivor kag katapo sang Iloilo Bosom FRIENDS Incorporated, iya ginpahayag nga ang pag-angkon sang breast cancer ang indi katapusan sang tanan.
Suno kay Ingalla, na-diagnose siya nga may breast cancer sang 1993 sa diin sang amo nga tion, lunsay pa naga-eskwela ang iya apat ka anak.
Matapos ma-diagnose nga may breast cancer, nakabatyag siya sang depresyon suno kay Ingalla apang samtang nagadugay, iya nabinag-binag nga wala na siya sang may mahimo kundi pakigbatu-an ang nasambit nga balati-an.
Ginpahayag ni Ingalla nga nagpadoktor siya kag nagpaidalom sa medical treatment apang natukiban naman nga may nagtubo nga spot sa iya gusok.
Sa pihak sang iya kahimtangan, ginpahayag sang natungdan nga wala siya nagdula sang paglaum paagi sa pagpangamuyo kag pagpaidalom sa mga medical treatment.
Bilang isa ka breast cancer survivor, ginpahayag ni Ingalla nga wala nangin mahapos ang iya gin-agyan bag-o nakapanumbalik sa iya trabaho bilang manunudlo.
