ILOILO – Indi makabig nga solusyon ang paghikog sa tion nga may yara sang problema.
Ini ang panugyan ni Iloilo Police Provincial Office Director Police Col. Roland Vilela sa nagataas nga kaso sang suicide incidents sa probinsya sang Iloilo.
Sa interview sang Bombo Radyo kay Vilela, iya ginpahayag nga indi lamang ang mga lamharon ang nagahikog kundi lakip man ang mga yara na sa legal nga edad.
Suno kay Vilela, sang 2017, naglab-ot lamang sa 57 ang suicide incidents, nagtaas sa 65 sang 2019 kag subong nga 2019, naglab-ot na sa 67 ang naghikog.
Ginpahayag ni Vilela nga kalabanan sa mga biktima ang nakabatyag sang depresyon nga mahimo tuga sang pagbag-o sang lifestyle sa subong nga moderno nga pangabuhi.
Bisan nga indi makabig nga lead agency ang Philippine National Police, ginpahayag ni Vilela nga iya nga ginmandu sa tanan nga pulis nga pasangkaron ang mga programa kag aktibidad agud nga makabulig sa pagtapna sang nagataas nga kaso sang suicide.
Bilang director sang Iloilo Police Provincial Office, ginpahayag ni Vilela nga bukas ang iya talatapan kag amo man ang iya nga communication line sa mga nagakinahanglan sang bulig may kaangtanan sa mental health.
Sa mga nagakatabo sa subong, importante suno sa natungdan ang papel sang ginikanan sa pagtatap sang ila kabataan.
