ILOILO – Wala pa sang petsa kun san-o magareport sa Police Regional Office 6 ang kontrobersiyal nga si Police Lt. Col. Jovie Espinido.
Ini ang kasunod sang huring-huring nga sa Bacolod City Police Office ang assignment ni Espinido.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga santo sa memorandum nga ila nabaton, sa Police Regional Office 6 ang masunod nga assignment ni Espinido apang wala nakasaad ang specific assignment sang kontrobersiyal nga pulis.
Suno kay Malong, sa Regional Personnel Holding and Accounting Unit ang posible nga assignment ni Espinido tubtub nga wala pa sang pinal nga desisyon si Regional Director Police Brigadier General Rene Pamuspusan.
Ginpahayag ni Malong nga bisan nga sang Oktubre 4 pa ang effectivity sang bag-o nga assignment ni Espinido apang wala pa siya sa gihapon naka-curtesy call kay Pamuspusan.
Ginpahayag nga buwas nga adlaw, maga-abot sa Campo Delgado si Espinido para sa pag-curtesy call sa Regional Director.
Sa subong, gin-athag sang natungdan nga wala pa sang kaathagan kun sa diin nga lugar sa Western Visayas iga-assign si Espinido.
