ILOILO CITY – Plano sang Local Economic Enterprise Office nga ideklara nga bakante ang mga stalls nga abandonado kag wala nakabayad sang renta sa sulod sang madugay nga tion sa mga merkado sa syudad sang Iloilo.
Sa interview sang Bombo Radyo kay Mr. Ariel Castañeda, pinuno sang Local Economic Enterprise Office, iya ginpahayag nga yara na ang ahensya sa ika-tatlo nga hugnat sa pag proseso kag pag verify sang mga stalls sa tagsa ka mga merkado.
Suno kay Castañeda, agud mahatagan sang oportunidad ang iban nga mga negosyante, ideklara nga bakante ang lugar ukon stalls sang mga “active delinquent” kag “abandoned & delinquent”.
Ang “active delinquent” ang mga tawo sa merkado nga may negosyo apang wala na nakabayad sang renta sa madugay na nga tion.
Samtang ang “abadoned & delinquent” naman amo ang mga pwesto nga wala na ginbalikan sang tag-iya kag wala naman nakabayad sang renta.
Base sa ordinansa pahayag ni Castañeda, ginapadal-an sang notice of closure ang tag-iya nga wala makabayad sang renta masobra tatlo ka bulan agud nga makabayad.
Apang sa tion nga indi pa gid ini makabayad, ini ang irekomenda nga ipasirado ang pwesto ukon stalls.
Ginahatagan man sang oportunidad ang mga negosyante nga ma okupar ang pwesto apisar indi siya ang stall owners apang kinahanglan anay nga ideklara nga bakante ang stall kag mahimo na ini gilayon nga mag apply.
Dugang pa sang natungdan, ang pag apply sang negosyante nga maga-okupar sang stall nga bakante ang magapaidalom sa adjudication process.
Base sa rekord sang city government, ang merkado nga may pinakadako nga balor sang renta nga wala mabayadan amo ang Iloilo Central Market balor P42 million.
