ILOILO CITY – Ginaabi-abi sang Police Regional Office 6 si Pol. Lt. Col. Jovie Espenido bilang Deputy City Director for Operations sang Bacolod City Police Office.
Sa interview sang Bombo Radyo kay Police Regional Office 6 Director Pol. Brigadier General Rene Pamuspusan, iya ginpahayag nga nagakadapat sa posisyon si Espenido.
Si Espenido ang makapot sa mga operasyon nga pagahimuon sang Bacolod City Police Office.
Suno kay Pamuspusan, si Espenido man ang chairman sang oversight committee on anti-illegal drugs.
Dugang pa sang natungdan, kun indi gid madala sa istorya kag indi mag-untat ang mga durugista sang ila iligal nga buluhaton, posible nga matabo ang pahayag ni Espenido nga mangin Nobyembre 2 na ang kaadlawan sang mga durugista.
Samtang una naman nga istoryahon ni Espenido ang squad staff sang Bacolod City Police Office sa mga problema sang syudad.
Suno sa iya, indi siya familiar sa drug groups sa Bacolod apang indi lamang ilegal nga droga ang iya pagatutukan kundi ang iban pa nga mga iligal nga aktibidad.
Nagpasalamat man si Espenido sa Police Regional Office 6 sa pagsuporta sa iya.
