ILOILO CITY – Magapasa sang ila tagsa ka rekomendasyon ang mga telecommunications company, Panay Electric Company kag cable company sa Iloilo City Council may kaangtanan sa paghitso sang nagalinukot nga wiring kag pagkuha sang poste nga nagasablag sa dalan sa syudad sang Iloilo.
Ini ang kasunod sang ginpatigayon nga ika duha nga committee hearing nga ginpamunu-an ni Iloilo City Councilor Rommel Duron, chairman sang Committee on Transportation, tuhoy sa nasambit nga problema.
Sa interview sang Bombo Radyo kay Iloilo City Councilor Ely Estante, vice chairman sang Committee on Transportation, iya ginpahayag nga sa Oktubre 24, patigayunon ang ika tatlo nga pagsinapol sa diin magapasa sang rekomendasyon ang tagsa ka stakeholder kun paano masulusyunan ang nagalinukot nga wiring kag ang mga poste nga nagasablag sa dalan.
Suno kay Estante, ginduso man ang pagtukod sang technical working group nga amo ang maga-review sang rekomendasyon kag sang ordinansa.
Ginpahayag ni Estante nga importante nga masulusyunan ang nasambit nga problema ilabi pa nga nagahilapit na ang Dinagyang Festival kag agud nga indi man magtuga sang huol sa publiko.
