ILOILO – Ginhangkat sang cause oriented groups si Police Lt. Col. Jovie Espinido nga unahon ang internal cleansing sa Philippine National Police antes pamatyon ang mga inosente bangud sa war on drugs campaign.
Ini ang kasunod sang pagpamatok sang cause oriented groups nga i-assign sa Western Visayas si Espinido.
Sa interview sang Bombo Radyo kay Reylan Vergara, secretary general sang Bayan Panay, iya ginpahayag nga indi sila maluyag nga sa Western Visayas iga-assign ang kontroberysal nga anay hepe.
Suno kay Vergara, madugo ang pamaagi ni Espinido sa pagpatuman sang war on drugs campaign sa diin naulamid ang mga kubos nga wala sang ikasarang sa pagbato.
Ginpahayag man ni Veragara nga sa mga anay area of assignment ni Espinido, may yara sang harassment nga nagakatabo santo sa pahayag sang iya mga kaupod sa nasambit nga cause oriented group.
