ILOILO CITY – Pasado na sa First reading sa Iloilo City Council ang odinansa nga ginaduso ni Iloilo City Councilor Lady Julie Grace “Love-Love” Baronda may kaangtanan sa pagdumili sang mga plastic straw kag stirrers sa mga establisimento, stalls ukon stand sa syudad.
Sa interview sang Bombo Radyo kay Councilor Baronda, iya ginpahayag nga ginduso na niya ini sadto nga administrasyon ni anay City Mayor Jose Espinosa III apang wala ini mapasar bangud wala nakapatigayon sang committee report.
Suno kay Baronda, ginduso niya sa liwat ang ordinansa bangud ini ang makabulig sa pagprotekta sa dunang manggad.
Malipayon naman ang konsehal sa positibo nga reaksyon sang mga tag-iya sang establisimento, stalls ukon stand sa nasambit nga ordinansa.
Mahimo nga sa masunod nga semana, ma deliberate sa liwat ang ordinansa sa Sangguniang Panlungsod kag nagalaom si Baronda nga mapasar ini gilayon.
